SEKALI LAGI: CUMA DRAMATISASI!
Theme song by Benyamin S.:
[audio:kompormeleduk.mp3|option1=value|option2=value]
“Jakarta kebanjiran… rumah ane kebanjiran…”Napa juga sewot? Gue bukannya kagak tau kalo elu-elu pade kebanjiran. Gue ngatri. I’m sorry to hear that lah.
Gue lair di Jakarta. Dari jaman orang susah — tapi sori, dari lair gue bukan orang susah — cuma bisa jalan kaki, makan telor dibelah delapan, rambut kelimis dikasih jelantah apek lantaran kagak mampu beli pomade, Jakarta tuh gampang kebanjiran.
Namanya juga perkembangan jaman, dulu banjirnya cuma belah sono noh lantas ini ari luber ampe kandang Porsche. Apanya yang aneh, hah?
Artinya orang tuh udah biasa kebanjiran. Benyamin Sueb udah bekoar “Jakarta kebanjiran hoi!” dari jaman Sarinah ama Hotel Indonesia dianggep paling keren. Tapi anehnya pake judul Kompor Meleduk.
Bedanya kalo taon kemaren banjirnya cuma semata kaki, eh… ini ari semata orang beneran. Itu namanya progres — sori gue pake bahasa sekolahan.
Kagak ada yang baru, kagak ada yang dahsyat. Gue ngerti banget gimana orang media bikin berita. Tukang kamera tipi ama Mat Kodak koran tuh pada jongkok ngerendem pantat kalo motret Kijang lagi nerabas genangan sedengkul bocah biar gambarnya dramatik.
Lantas biar kagak ngebosenin, gambar anak-anak kurang hiburan pada nyebur ke aer juga diambil. Dasar kepingin nampang di tipi, ibu-ibu dapur umum malah senyum kalo disorot kamera. Derita apaan tuh?
Belon lagi radio. Tanpa gambar, cuma orang lapor pake telepon tapi dipercaya. Apa buktinya ada rumah tenggelem? Entar kalo di radio ada orang bilang Monas tinggal pucuknya pasti pada percaya.
Apa salah kalo gue bilang banjir ini jadi luar biasa lantaran didramatisir ama media?
Gue ngatri di mana-mana aer. Tapi liat aja, apa dunia jadi kiamat? Siapa bilang ada kelaperan? Meeting, sori maksud gue rapat, di gedung-gedung tetep bisa jalan soalnya kalo mau snack apa lunch gitu tinggal pesen. Ini justru tantangan buat entrepreneurship selagi ngadepin masalah — sori gue pake bahasa sekolahan. Gitu yang gue baca di The Jakarta Post kemaren: services deliver in spite of flooding. Sori gue kagak perlu nerjemahin. Jangan cuma baca Pos Kota ama Lampu Merah dong.
Gatel kulit macem korengan, lantas mules mencret, itu mah soal kebiasaan idup. Kalo demen ama yang jorok-jorok ya gitulah jadinya. Kagak usah pake banjir, kalo suka jorok biar kata ari panas kagak mendung, pasti kesehatan kagak beres.
Udah jelas belon? Kerendem lumpur panas aja kagak mampus apalagi cuma aer. Cuma aer! Take it easy, man!
With
luvlaugh,Ical